خرجة تونسية 6

ا سادة و يا مادة يدلنا و يدلكم ربي للخير و الشهادة ناوين على ربي" جمعية تراثنا "باش تحتفل كيما كل عام بالعيد الوطني للباس التقليدي التونسي الي يجي نهار 16 مارس 2019 و و بما انو نهار 16 مارس 2019 يجي بنهار السبت باش نعملو الاحتفال متاعنا نهار الاحد 17مارس 2019 إن شاء الله يوم راحتنا , و كان كتب المكتوب باش نخرجو نهارتها بلبستنا التقليدية التونسية, الرجال بالبرنوس و الجبة و الشاشية القرمز على روسهم و النسا بالسفساري و الملية و العجار و الخامة و علاش لا القفطان و مريول فظيلة و الكوفية و كل ماهو تونسي...وكيما نجحت التضاهرة عام ناول باش نعملو دولاشة من قدام جامع الزيتونة , نتعداو على الاسواق العربي و من بعد باب بحر حتى لشارع الحبيب بورقيبة لين نخلطو للمسرح البلدي و نعملو وقفة مزيانة بلباسنا المزيان التونسي و نفرحو بهويتنا التونسية و بش نسميو فرحتنا هذه :الخرجة التونسية